یادِ رفتگاں
ایک علمی، مذہبی اور سیاسی شخصیت ۔۔۔ پیر عارف حسین شاہؒ بخاری
بعض شخصیات اپنے اخلاق، کردار اور خدمتِ خلق کے باعث لوگوں کے دلوں میں ہمیشہ زندہ رہتی ہیں۔ پیر عارف حسین شاہؒ بھی ایسی ہی باوقار اور باعمل شخصیت تھے۔ آپ کا تعلق حافظ آباد کے نواحی گاؤں دوپٹہ عظمت سے تھا۔ آپ نیک دل، نیک نیت، مخلص اور دردمند انسان تھے جنہوں نے اپنی پوری زندگی دین، عوام اور انسانیت کی خدمت کے لیے وقف کیے رکھی۔
آپ جمعیت علمائے پاکستان کے پلیٹ فارم سے ممبر صوبائی اسمبلی منتخب ہوئے، مگر منصب اور اختیار نے کبھی آپ کی سادگی، انکساری اور خلوص کو متاثر نہ کیا۔ آپ کے دروازے ہر خاص و عام کے لیے کھلے رہتے تھے۔ ہر آنے والے کا خندہ پیشانی، محبت اور احترام سے استقبال کرنا آپ کی پہچان تھا۔ آپ کے چہرے پر سجی مسکراہٹ دلوں کو تسکین بخشتی اور آپ کی گفتگو اخلاص اور شفقت کا آئینہ دار ہوتی تھی۔
پیر عارف حسین شاہؒ ایک باعمل عالمِ دین تھے جن کے دل میں انسانیت کا درد اور عوام کی خدمت کا جذبہ ہمیشہ موجزن رہا۔ حافظ آباد کی عوام آپ کی دینی، سماجی اور سیاسی خدمات کو ہمیشہ قدر کی نگاہ سے یاد رکھے گی۔ آپ کی یادیں، آپ کا کردار اور آپ کی خدمت کا سفر آنے والی نسلوں کے لیے بھی مشعلِ راہ رہے گا۔
اللہ تعالیٰ پیر عارف حسین شاہؒ کی کامل مغفرت فرمائے، ان کی قبر کو نور سے بھر دے، انہیں اپنی جوارِ رحمت میں اعلیٰ مقام عطا فرمائے اور جنت الفردوس میں بلند درجات نصیب فرمائے۔ آمین یا رب العالمین۔